• it
  • fur
  • en

I numars di Folkest

I numars di Folkest
Il Friûl – Vignesie Julie par Folkest, Folkest pal Friûl – Vignesie Julie

Une regjon multietniche, plene di tesaurs di art e di nature.
Il Friûl al è, di secui, regjon multietniche par antonomasie, là che a àn convivût e a convivin furlans e roseans, ladins e slovens des vals de Tor e dal Nadison, gjermanofons e venits, julians e slovens dal Cjars. Dome intune regjon cussì plene di stimui culturâi diferents al podeve nassi Folkest, festival che in 38 agns di vite al à ufiert ai spetatôrs musichis cence confins e nancje definizions: i irlandês The Chieftains e Miriam Makeba, Donovan e Fabrizio Di André, Joan Baez e un danzadôr indian, un musicant rosean e Van Morrison, ritmis e colôrs de Oceanie e de Afriche orientâl, chê musicalmentri plui impuartante e misteriose.

Turisim interni e esterni
No dome chest substrât culturâl, però, al à fat sì che la sinergjie fra teritori regjonâl e Folkest si disvilupàs in maniere cussì funzionâl e plene di valôrs: vilis, cjistiei, placis antighis, parcs centenaris si son ufierts, intai agns, tant che senaris perfets par ambientâ concierts spetacolârs o avigniments plui cuiets e intims, moments di studi e aprofondiment, ativitâts seminariâls e espositivis; dut chest al à creât un automatisim virtuôs che al à puartât sì in Friûl – Vignesie Julie centenârs di miârs di turiscj talians e europeans (Austrie, Republiche Ceche, Slovachie, Slovenie, Cravuazie, Svuizare ma ancje France, Lussemburc, Spagne, Gjermanie, Polonie e fin Finlande e Danimarcje), ma ancje – e forsit soredut – al à caraterizât a fuart il turisim interni, invidant i residents in regjon a cognossi miôr la proprie tiere di origjin o di residence.

Folkest, o dai primâts
Folkest al svante diviers primâts obietîfs: al è il prin folk festival dal Sud de Europe e za di timp al à passâts il milion di spetatôrs complessîfs; al è l’unic festival talian folk associât a Assomusica fin de sô fondazion; al è chel plui antîc e s plui grant, par dimension, festival talian folk e “chel plui impuartant de Europe Mediteranie” (definizion dal ufici stampe Womex, an 2003), ma al è ancje il prin folk festival talian a jessi stât argoment di une tesi di lauree: “ Folkest – L’evento musicale come mezzo di promozione regionale”, tesi di laurea di Elena Florean – Ca’ Foscari – relatôr prof. Jan Van Der Borg.

Une tesi universitarie
Cierts pas di cheste tesi a son iluminants: “Folkest al assum un rûl no secondari inte ufierte turistiche dal Friûl – Vignesie Julie, stant che al è un progjet che al va di là dal sempliç, ma fondamentâl, aspiet musicâl. Il festival, cu la sô carateristiche di jessi itinerant, al fâs scuvierzi cjantons dismenteâts de Regjon, indi al promôf lis ricjecis, lis riscuvierç e lis valorize, proponintsi alore tant che un impuartant subiet di promozion culturâl e turistiche. Il program di ogni edizion al costituìs cuasi une sorte di itinerari turistic in lûcs tant sugjestîfs dal Friûl – Vignesie Julie, che a son però di simpri taiâts fûr, in plui che des normâls “tapis” dai concierts, ancje dal turisim. Lis presincis turistichis gjeneradis di Folkest a son di podê cuantificâ intal ordin di miârs di unitâts. E je cheste une valutazion dai efiets espansîfs dal moviment turistic, sielts dai procès di sostituzion che si son verificâts dentri de regjon propit pe presince dal festival. Une cuote di turiscj presints a Folkest, di fat, e à cjapât il puest dai turiscj che a varessin passât un periodi di feriis inte regjon. L’efiet di sostituzion al risulte tant plui consistent cuant che lis struturis ricetivis a presentin tas di ûs alt. La stime des presincis turistichis in relazion a Folkest e je stade fate midiant di une analisi che e permetès di distingui i spetatôrs furlans di chei rivâts di fûr regjon o dal forest. Folkest, di fat, al rapresente un riclam fuart bande une tiere che e ufrìs tantis altris bielecis. Al è par chest motîf che le publichi, si è viodût che in gjenerâl il turist al sielç di fâ une permanence curte inte zone dal festival: dal 40% dai talians che a vegnin di fûr regjon, il 15% (cuatri mil personis plui o mancul) al reste almancul une dì intal teritori furlan; dai forescj, un tierç (plui o mancul trê mil personis) al reste inte Regjon une gnot e un altri tierç, invezit, al reste almancul doi dîs cjapant puescj-jet prin di dut in albiercs a trê o cuatri stelis”.
E ancjemò: “I efiets economics di Folkest, a puedin ricondusisi a dôs diviersis tipologjiis, chei specifics (leâts in maniere direte ae nature e ai obietîfs de manifestazion) e chei gjenerâi. Ae prime categorie a apartegnin efiets tant che chel de ocupazion ativade a nivel locâl par fâ pussibil la realizazion des manifestazions. La ipotesi, che e permet la assegnazion de manifestazion a cheste categorie di impat, e je chê de esistence di risorsis economichis e umanis mobilitadis, in funzion turistiche. Simpri in cheste categorie, di tignî presint e je la poie furnide dal festival ae produzion e ae ufierte dai diviers comparts culturâi. Chei altris efiets economics gjenerâts a àn tant che ogjet lis ativitâts turistichis e i setôrs a chestis leâts. A son efiets “no specifics”, ma che no puedin no jessi cjapâts in considerazion.
Sul plan de economie regjonâl dopli al è l’efiet:
1.    Plui presincis intai albiercs, plui redit, plui ocupâts, che si concretizin dilunc dal periodi de manifestazion, duncje limitâts intal timp;
2.    Promozion e publicizazion de imagjin regjonâl in Italie e tal forest, cun efiet permanent.
L’efiet si estrinseche ancje intun sparagn di risorsis di destinâ ae promozion e publicitât a fins turistics. Al è chest un benefici di podê valutâ traviers il cost-oportunitât, ven a stâi midiant des risorsis che a saressin stadis necessariis par fâ une azion promozionâl ecuivalente.
Une part minime di chescj flus movimentâts al reste ae organizazion (biliet e gadgets), intant che la plui part e alimente un indot leât prin di dut aes ativitâts turistichis. I doi setôrs plui coinvolts che a cjapin i efiets benefics de presince dal public che al reste sul teritori a son dal sigûr il setôr alberghîr, chel de ristorazion e in part minôr ancje chel dal cumierç di souvenir o prodots agroalimentârs locâi.
Dutis lis categoriis, dut câs, a son dacuardi intal afermâ che intal periodi de manifestazion, ven a stâi intal mês di Lui, il volum di afârs al regjistre un aument. Chest volum, di dificile cuantificazion pe dificoltât intrinsiche dal setôr turistic intal delineâ dutis lis ativitâts economichis cjapadis in maniere direte e in maniere indirete, al rive, su la base des stimis, a plui o mancul trê milions di Euros. Un risultât avonde preseabil stant la grandece atuâl dal avigniment e lis sôs pussibilitâts di cressite future, cuntune ricjadude economiche-turistiche che al sarà di impat simpri plui impuartant su dut il teritori regjonâl”. (ibid.)

No dome concierts
Ma Folkest nol è dome festival, nol è dome turisim, nol è dome concierts: al è titolâr di un concors nazionâl clamât Suonare@Folkest (Sunâ@Folkest) articolât in siet selezions regjonâls in diviersis parts di Italie; al è titolâr di un concors nazionâl clamât Creare@Folkest (Creâ@Folkest), che al selezione lis miôr ideis grafichis che di chês al vignarà ae fin fat il manifest di Folkest; al è titolâr di un concors a nivel talian clamât Filmare@Folkest (Filmâ@Folkest) che al premiarà i miôr curts che a àn tant che argoment Folkest; al da il propri non a une etichete discografiche (Folkest Dischi); al è propulsôr di www.folkbulletin.com, deventât intai agns su internet il portâl dal folk talian, dopo une ativitât ultraventenâl su cjarte tant che riviste mensîl. Soredut, Folkest e je une grande machine organizative che e movimente un numar impuartant di personis e robis, animant diferents setôrs economics cun grandis ricjadudis su lis ativitâts dal teritori e no dome.

I grancj numars di Folkest
tacant dal 1996, la informatizazion complete dai servizis aministratîfs di Folkest e à permetût di podê archiviâ une serie di dâts che a costituissin il patrimoni operatîf dal festival (pai agns di prime dal 1996 e interven la memorie storiche dai impleâts).

LOCALITÂTS INTERESSADIS DAL FESTIVAL 343
MUSICISCJ PARTECIPANTS 4.634
CONCIERTS FATS 1.707
SVOI INTERCONTINENTÂI IN AVION 347
SVOI EUROPEANS 695
SVOI TALIANS 845
KM FATS CUN MACHINIS DI PROPRIETÂT 203.820
KM FATS CUN MACHINIS A NAULI 211.820
GUSTÂS CONSUMÂTS IN RISTORANTS PAR ARTISCJ E OSPITALITÂT A CARIC DE ORGANIZAZION 85.783
GNOTS IN ALBIERCS PAR ARTISCJ E OSPITALITÂT A CARIC DE ORGANIZAZION 23.416