• it
  • fur
  • en

Il Festival

FOLKEST AN XXIX

Udin, Spilimberc, Vile Manin, Tumieç, ma ancje Cjaudistrie e la Slovenie a daran bon acet tant che ogni an ae caravane itinerante di Folkest, un festival di colôrs cun Artiscj tant diferents tra di lôr che nus contaran liendis antighis e storiis comunis, saghis di erois e contis di int semplice che a apartegnin a ducj e che a fasin part de braùre culturâl dai popui, ma che dispès a son lis stessis storiis, dome declinadis in lenghis diviersis. Dius, semidius, pan azim e pan neri…
O lin a scuvierzi une Europe miscliçade, no di cumò ma di simpri, par sô stesse vocazion, cun lidrîs ben saldis intal bacin dal Mediterani, cuntun focus su la citât di Napoli e su la sô trame culturâl complesse, multietniche par conotazion, napoletane par vocazion e unicitât de ispirazion musicâl. Ve alore une schirie di grancj artiscj partenopeus, vuidade di Enzo Avitabile, resint vincidôr di ben doi Premis David di Donatello, Teresa De Sio, il progjet VESEVUS cun Solis String Quartet, Gianluca Brugnano e Giovanni Falzone, Jenny Sorrenti cun Saint Just e i plui zovins, Vianova e Sun&Passion.
Nol mancjarà il mont de cjançon anglosassone cui princips e inventôrs dal folk-rock britanic Fairport Convention, premiâts cul Premi Folkest ae Cariere, e la vôs dai Genesis, Ray Wilson, cussì come il spazi pes gnovis frontieris dal folk-metal, cui lombarts Folkstone e, come pal solit, pe grande cjançon di autôr taliane, cun Ron.
No mancjaran i sunôrs e lis melodiis di tradizion e di ispirazion celtiche, une sezion che no mancje mai al festival, cussì come lis musichis di confin, dal manouche al balcanic, al klezmer, al blues.
Anteprime significative a Ospedâl di Glemone: une serade dute al feminin, che e tornarà a cjapâ in maniere ideâl il focus dal an passât dedicât ae Sardegne, cu la presince di Ambra Pintore cul so cuartet (za vincidore assolude di Sunâ@Folkest intal 2015) e che e darà spazi ancje ae zovine Martina Iori, ladine dal Trentin.
Infin, il grant cjapitul des gnovis propuestis talianis cul apontament di Sunâ@Folkest. Ai 4 di Lui, pe seconde volte dopo dal sucès organizatîf dal an passât, si fasarà in Cjistiel a Udin la serade conclusive dal concors Sunâ@Folkest, che e viôt la nassite de gnove colaborazion tra Folkest e il Premi Fabrizio De André di Rome. Ospits di onôr, clamâts a concludi la serade, i sicilians “Pupi di Surfaro”, vincidôrs dal Premi Andrea Parodi di Cagliari pal 2016.
Numerosis lis produzions speciâls (Tina Modotti, Tapestry, Ponti/Puints, Capitano Tutte a noi).
Lis presentazions di cualchi novitât librarie, incuintris e dibatiments publics a fasaran di corolari ai moments plui spetacolârs dal festival, rapresentant un so completament ideâl.

Viodìnsi a Folkest!