Folkest 2019 al anunzie il grant conciert event de icone de musiche celtiche, la cjantautore e polistrumentiste canadese cognos’sude in dut il mont Loreena Mckennitt, che e torne in Italie cuntun gnûf tour estîf par presentâ il so album di inedits “Lost souls”.
Sîs lis tapis intal nestri paîs, oltri a Firenze (20/7), Milan (21/7), Macerata (24/7/), Rome (25/7) e Molfetta (Bari) (26/7) ancje il Cjistiel di Udin il prossim 22 di Lui par Folkest 2019.

Folkest, il grant festival che al esplore lis musichis e lis culturis dal mont, al rignuvìs ancje pe prossime edizion, la cuarantunesime, il so spirt e la sô mission di grant contignidôr di dute chê musiche che, dilà dal jessi definide folk, world, jazz o cjantautorâl, pure o contaminade, e sa dâ vôs aes lidrîs culturâls di cualsisedi part dal mont, smirant a deventâ, inmò une volte, une ocasion buine par passâ i confins tra i gjenars.
 Simpri articolât in plui di 25 placis furlanis, ’fin ae Istrie slovene, Folkest 2019 – in program tra i 20 di Jugn e i 8 di Lui, cuntun interessant prolic inte Vierte – al anunzie la star protagoniste de prossime edizion, une stele internazionâl che e varà il compit di segnâ la edizion 2019 di Folkest cuntun conciert che za si preanunzie come un dai events dal Istât musicâl in regjon. Cuntun gnûf album di inedits publicât chest an cul titul “Lost Souls” (Quinlan Road, 2018), e torne in Italie la cjantautore e polistrumentiste canadese famose in dut il mont, icone de musiche celtiche, Loreena McKennitt, cuntun tour estîf di sîs datis vie par dute la nestre peni’sule. Oltri a Firenze, Milan, Rome, Macerata e Bari, lunis ai 22 di Lui e sarà par Folkest al Cjistiel di Udin. I biliets a son disponibii a partî des 15.00 di vinars ai 7 di Dicembar ’su circuit Ticketone, cussì come ’sul sît di Folkest (www.folkest.com) e al Angolo della Musica di vie Aquileia a Udin e Fioreria Punto Verde a Tumieç.
A plui o mancul dîs agns di distance de publicazion dal so ultin album di inedits, Loreena McKennitt e je tornade intal mês di Mai di chest an cuntun gnûf lavôr e e je pronte a presentâlu ’ator pe Europe, cuntun totâl di 25 concierts passant par dîs paîs come Spagne, Gjermanie e, juste apont, Italie. La cjantautore e à origjins irlandesis e scozesis e a son stadis chestis a vê influençât la sô musiche, che e cjape ispirazion des cjançons celtichis popolârs dulà che jê e zonte une vene internazionâl, cuntun ri’sultât sorprendent e preseât in dut il mont. 
I tocs di Loreena McKennitt a contin musiche e storiis che a àn ispirât la artiste dilunvie i siei viaçs te ricercje des tradizions celtichis in Cine, Mongolie, Turchie e Irlande. La sô musiche, che e va dal sound celtic ecletic, al pop, al folk e ae world music, e à concuistât critiche e public. La artiste e à masanât numars impuartants: 14 milions di albums vendûts cun discs di aur, di platin e multi platin. Nomenade dôs voltis ai Grammy Awards, e à vint doi Juno e il premi ae cariere de Billboard International. E à ’sunât intai teatris plui impuartants, de Carnegie Hall al palaç Alhambra di Granada in Spagne, ’fin aes performance pe regjine Elisabetta II.
In prevision dal so prossim tour estîf Loreena e à dit: “O soi entusiaste di tornâ in cualchidun dai puescj za visitâts intai agns passâts e di tornâ a viodi personis cjatadis dilunc dai miei tour di prime, ma ancje di esibîmi in puescj bielons mai viodûts prime”. Cun di plui la cjantautore no sarà di bessole ’sul palc, ma e sarà compagnade dai musiciscj Brian Hughes (ghitare, oud e bouzouki celtic), Caroline Lavelle (violoncel), Hugh Marsh (violin), Dudley Philips (cuintribàs) e Robert Brian (batarie).
Informazions par comprâ i biliets: 
info@folkest.com – 0427 51230 – 335 1202124

Online: www.folkest.com
Prevenditis biliets
 Folkest (teatri Miotto) – Spilimberc – 0427 51230;
 Angolo della Musica – Udin – 0432 – 505745; 
Fioreria Punto Verde – Tumieç 0433 40114.