A vegnin di ogni bande dal mont i artiscj che, come ogni Istât cence interuzion dal 1979, a animaran i tancj palcs di Folkest, il principâl festival che al esplore lis musichis e lis culturis dal mont, chest an in program dai 22 di Jugn ai 12 di Lui che al ven, cun ancje cualchi altri impuartant avigniment sucessîf.
Une anteprime significative al festival e je in program a Ospedalet di Glemone cuntune serade dute al feminin, che e tornarà a cjapâ in maniere ideâl il focus dal an passât dedicât ae Sardegne, cu la presince di Ambra Pintore cul so cuartet, za vincidore assolude di Sunâ@Folkest intal 2015. Cjantante, atore, condutore, Ambra e je une artiste complete: “Terre del ritorno” al è il so secont disc, che al vignarà presentât propit a Folkest, prodot di “S’Ard Music”. Une evoluzion significative pe cjantante, autore ancje dai tescj e des musichis, par dîs storiis che a viazin in sart, sicilian, puliês, francês, inglês supuartadis des melodiis jazz di un sax, des sugjestions des launeddas, dal country di une sunete.
Sul stes palc e cjatarà spazi ancje la zovine Martina Iori, fassane doc al pont di favorî il so ladin ancje intes cjançons che e scrîf, tant che intal so prin album “Amore e Buscofen”.
Martina Iori e à scomençât a vot agns rivant tierce al “Zecchino d’oro”, cence plui lassâ il mont de musiche. E cumò si cjate, a dome 21 agns, cuasi laureade in violin al Conservatori di Bolzan e e parone ghitare, flaut, piano e ukulele.
