Dopo di une edizion cetant emozionante e cun grancj numars si è sierade te serade di lunis ai 22 di Lui tal cjistiel di Udin cul conciert di Loreena Mc Kennit la 41e edizion di Folkest.
Une presince di public cussì numerôs e diferent ancje par etât nus mostre che la strade cjapade e je chê juste e soredut e rapresente un invistiment pal avignî dal festival stes. Cirche 12.000 personis distribuidis tra 50 apontaments tai 22 comuns cjapâts dentri pe edizion 2019: Sauris, Duin, Tramonç Disore, Pulfar, Romans dal Lusinç, Travês, con cualchi apontament significatîf a Gurize, Spilimberc, Udin, cun Cjaudistrie e, novitât di chest an, il comun di Auronzo di Cadore, pe prime edizion di Folkest in Cjadovri.
Artiscj di dut il mont a àn animât i tancj palcs di Folkest – event che de sô fondazion al è stât atent a musichis di etniis e culturis diferentis – dai 20 di Jugn ai 22 di Lui: Scozie, Serbie, Slovenie, Irlande, Ongjarie, Colombie, Austrie, Republiche Ceche, Argjentine, Polonie, Bielorussie, Cravuazie, Bosgne, Ingletiere, Canada e Italie.
Tra i grancj nons ospits di cheste edizion il duet Shel Shapiro – Maurizio Vandelli cul lôr “Love and Peace Tour”, la intramontabile formazion de PFM impegnade tal “TVB – The very best tour” e la cjantautore canadese Loreena McKennit, star internazionâl de musiche folk che tal plaçâl dal cjistiel di Udin e à incjantât plui di 1500 personis.
Folkest cumò si sposte in Cjadovri par altris apontaments impuartants ai 10 e ai 25 di Avost.
