Folkest 2018

FOLKEST AN XXXX – 40e edizion – Folkest 2018, 40 agns di festival

A vegnin di ogni bande dal mont i artiscj che, come ogni Istât di cuarante agns in ca, a jemplaran i tancj palcs di Folkest, chest an in program dai 21 di Jugn ai 9 di Lui: oltri a Udin, Spilimberc e Gurize a son diviersis lis localitâts tocjadis, par un totâl di 26 comuns dal Friûl Vignesie Julie.

folkest 2018, 40 anni di festival

Un festival che pe sô stesse nature ’tal è par fuarce di robis il ri’sultât di colaborazions, a ducj i nivei, al dispon dal Alt Patrocini de UNESCO, dal Ministeri dai Afârs cul forest, dal MIBACT, dal Ministeri de Culture de Republiche di Slovenie, de Regjon Friûl Vignesie Julie, de ARLeF (che cun chê Folkest al à un progjet trienâl di colaborazion) e de Fondazione Friuli (che tal percors artistic e organizatîf di Folkest e à crodût e e continue a crodi), che insiemi a sostegnin la iniziative cul Comun di Spilimberc, di Udin e di Cjaudistrie, la CAN di Cjaudistrie. L’AIAS Cjaudistrie, il NuovoImaie e dutis lis aministrazions locâls coinvolzudis di Folkest 2018. Impuartants ancje i media partner, che a viodin in prime linie la sede Rai dal FVJ, TV Koper-Cjaudistrie, il Giornale della Musica, Folk Bulletin e la Fondazione Andrea Parodi, compagne e zimule di Folkest de Sardegne. Cence dismenteâ un cjâr amì di Folkest come Leo Orafo di Spilimberc, che ogni an al regale une preziose zoie artesanâl al vincidôr dal Premi Folkest ae cariere.

A ’sunaran artiscj une vore diferents tra di chest an ’sui palcs di Folkest, che al vûl festezâ il travuart dai siei prins cuarante agns cuntune caravane multico che si môf di vile in vile, di cjistiel in cjistiel, di un borc rustic a di chel altri, visitant puescj de memorie de nestre int e valorizant dute chê musiche che, di là dal jessi tecnichementri folk, world, jazz o cjantautorâl, pure o contaminade, e savedi dâ vôs aes lidrîs culturâls di ogni bande dal mont. Passâ i confins tra lis musichis e i gjenars, fasintnus contâ liendis antighis e storiis comunis, saghis di erois e contis di int semplice che a son di ducj e a fasin part de braùre culturâl dai popui, ma dispès a son lis stessis storiis, ancje se declinadis in lenghis diviersis e nus contin chest nestri Vieri Continent intun corisi daûr di cjants che a vegnin de Magna Grecia ae Scozie, de Bielorussie ae Irlande, de Sicilie ae Svezie.

Un troi di cognossince, un lunc viaç tra lis plui bielis localitâts de nestre regjon, dulà che no mancjaran lis sonoritâts e lis melodiis di ispirazion celtiche, une sezion che no mancje mai al festival, cussì come lis musichis di confin, dal manouche al balcanic, al klezmer, al blues. Cuntune vualmade ’sul folk-metal, cuntun dai grups dal Est Europe plui titolâts dal setôr, i bielorùs Irdorath.
Cence dismenteâsi de principesse dal blues dai Balcans, la bosgnache Amira Medunjanin cul so ghitarist cravuat Ante Gelo, o i marchigjans de La Macina, che a festezaran a Folkest i cincuante agns di cariere, i istrians Vruja e i piemontês de La Mesquia e la furlane Serena Finatti, che a presentaran il gnûf disc produsût di FolkestDischi.

La produzion speciâl dal 2018, in colaborazion cu la Associazion Gottardo Tomat, che e met in cjamp un grup di docents e arlêfs, sot de direzion dal M.° Davide De Lucia, e sarà dedicade a une rileture de musiche di Sting.

Al torne po un dai apontaments di ponte de kermesse, Suonare@Folkest che pe prime volte chest an al puartarà la sô fase finâl a Spilimberc: oltri aes esibizions in conciert dai grups cualificâts, in program lunis ai 9 di Lui la finalissime, cjapade dal dut cu lis telecjamaris dai programs de Sede Rai dal Friûl Vignesie Julie, cu la presince ’sul palc come condutôr il famôs autôr e gjornalist di Rai Radio1 Gianmaurizio Foderaro. Ospit d’onôr de serade la artiste sarde Daniela Pes, vincidore dal Premi Andrea Parodi di Cagliari pal 2017.

folkest 2018, 40 anni di festival

Cun chest an al cambiarà dal dut il spazi de Tor Orientâl a Spilimberc, che e vierzarà aes 18 dant spazi a diviersis presentazions editoriâls di cualitât.
Si spiete a Folkest, tra chei altris, Adriana Schepis cu la sô biografie “Patti Smith – Voglio, ora” che e conte la vite de famose autore e cjantante fate di re’surezions continuis, colps di sene, ats di ribelion e svoltadis imprevedibilis. Simpri sabide ai 7 di Lui, Enzo Gentile e Roberto Crema a presentaran “Hendrix’68 – The Italian Experience” che i autôrs a dedichin a chê prime e uniche volte di cuant che Jimi Hendrix e i siei Experience a vignirin in tour in Italie, tal mês di Mai dal 1968: fotos mai publicadis, testemoneancis di spetatôrs fortunâts, articui e rivistis origjinâi, biliets e altris memorabilia a componin un caleidoscopi di ricuarts tal cincuantesim aniversari di chel event memorabil.

Tra i ospits plui spietâts ancje Claudio Trotta cul so “No pasta no show”. Trotta ’tal è in assolût tra i plui famôs e stimâts produtôrs e promoter indipendents di spetacui dal vîf tal mont che de fin dai agns Setante al à organizât plui di cuindis mîl events in Italie e tal mont lavorant cun artiscj come Bruce Springsteen, AC/DC, Kiss, Sting, David Bowie, Metallica, Frank Zappa, Elio e le Storie Tese, Renato Zero, Ligabue, Negramaro e tancj altris…

 

CJAUDISTRIE

No si à di dismenteâ Folkest a Cjaudistrie, colone fondamentâl di ogni edizion dal festival di vincjecinc agns in ca, che chest an al proponarà trê apontaments: il Progetto Arsenale, produzion speciâl dedicade aes musichis dal Mediteranei venezian; la mitiche formazion bosgnache Mostar Sevdah Reunion e il vieli leon Shel Shapiro.

UDIN

Par ultime, ma dome in tiermins di lunari ’tal è clâr, la capitâl dal Friûl, Udin, che e darà acet te aromai ben cognos’sude e preseade ’suaze dal Cjistiel l’event principâl di Folkest e un dai events clou dal Istât no dome furlane: un dai cuatri concierts talians de tournée che e viodarà il cumiât aes senis di Joan Baez.