FOLKEST SI SPOSTE TRA SETEMBAR E OTUBAR 2020

Il plui impuartant festival talian pe world music, stant la emergjence sanitarie mondiâl, par chest an si davuelzarà dai 17 di Setembar ai 4 di Otubar. Te composizion dal program une atenzion particolâr e sarà dedicade ai artiscj talians tra i prins a jessi penalizâts des ultimis restrizions.

Folkest al fronte la emergjence spostant il so program di concierts, premis, incuintris di aprofondiment e libris dai 17 di Setembar ai 4 di Otubar. I apontaments a saran duncje distribuîts tra Setembar e Otubar par saludâ la Sierade a dute musiche (ma no dome). I responsabii di Folkest, in acuardi cu la trentine di Comuns dal Friûl-Vignesie Julie coinvolzûts tal program – di Sauris a Duin passant par Tramonç Disore e Pulfar, Romans dal Lusinç, Travês ma ancje Udin, Gurize e oviamentri Spilimberc, Cjaudistrie e Auronzo di Cadore – a àn decidût di frontâ la emergjence COVID-19 deventade, magari cussì no, mondiâl, spostant il festival in altris datis.
Folkest al è un festival che dilunc dai siei 41 agns di ativitât al à savût deventâ il centri di une rêt impuartante di relazions in cjamp musicâl in Europe e tal mont cjapant dentri ogni an artiscj di dut il mont, vêrs e propris vuardians de musiche di diviersis etniis e culturis. “Pal 2020 – al dîs il diretôr artistic dal festival Andrea Del Favero – e je une nestre precise volontât chê di dedicâ une atenzion particolâr ai musiciscj talians che, come che si sa, a son stâts tra i prins a jessi penalizâts des cancelazions dai lôr tours e concierts”. Il program dal festival di fat, al cjaparà dentri i miôr talents talians, vêrs e propris vuardians e interpretis de buine musiche de nestre tradizion che e je simpri buine di rinovâsi. Puartâ la culture dulà che e je la int e je stade fin dal inizi la idee di fonde di Folkest, un festival multicolôr nassût in gracie dal contribût de Regjon Friûl-Vignesie Julie e al supuart fondamentâl de Fondazione Friuli, e dongje di chei i Comuns e lis organizazions des diviersis localitâts dulà che o sin lâts, e lis sôs sieltis artistichis di tancj agns a àn fat cognossi chest event in dute Europe, confermantlu come palc ideâl par palesâ gnûfs talents ai voi dal public european. Folkest di simpri al è indreçât ai zovins, jessint tra l’altri formât soredut di zovins: te scuadre organizative dal festival, gjavâts fûr cualchi “storic” protagonist, il grup al vante forsit la plui basse etât medie tra i varis festival regjonâi, in face a un alt nivel professionâl metût in cjamp. Folkest al promôf i zovins musiciscj talians ancje midiant il Premi Folkest – Alberto Cesa, rivât chest an ae sô decime edizion e che lis selezions pal 2020 si son a pene sieradis, contribuint cussì ae lôr formazion professionâl di nivel european, midiant la colaborazion cun varis festival de Europe.
Il Premi Alberto Cesa, che al cjape dentri ogni an cirche centecincuante artiscj, al è dedicât a dute chê musiche che, di là di jessi classificade come folk, folk-rock, etniche, etno-jazz, world, new acoustic, minimaliste, ghitaristiche, cjançon d’autôr, cjantestoriis, artist di strade (cun prevalente ativitât musicâl), e savedi dâ vôs a une o plui lidrîs culturâls di cualsisedi part dal mont. Al va sotliniât che chest premi al è un dai pôcs – insiemi al Premi Parodi di Cagliari che si dediche ae world music in Italie, util – oltri a fâ circolâ gnûfs nons e gnûfs grups – soredut aes band zovinis che a àn mût cussì di scuvierzi il mont che al è ator, cognossi altris musiciscj, contâsi problemis e soluzions, scambiâsi contats e discs. Il bant 2021 dal premi si pues za discjamâ online [button color=”#ffffff” background=”#9e0b0f” size=”medium” src=”https://www.folkest.com//wp-content/uploads/2020/03/Premio-Alberto-Cesa_2021.pdf”]Discjame il bant[/button]