Le formazion Musica Spiccia si è adiudicade le finalissime dal concors Premio Folkest – Alberto Cesa 2020, prestigjôs premi inserît tal ambit de cuarantedoiesime edizion di Folkest.
Le finâl si è tignude lunis 5 di Otubar a Spilimberc e a l’è stât votât il miôr grup tra vot finalists di une zurie di alt nivel fra gjornaliscj, musiciscj e produtôrs componude di John Vignola, Elisabetta Malantrucco, Duccio Pasqua, Claudia Brugnetta, Alessandro Nobis, Daniel Spizzo, Maurizio Bettelli, Edoardo De Angeli, Teresa De Sio, Elena Ledda, Alessandro D’Alessandro, Silvio Orlando e Mauro Palmas.
Il grup lombart a l’à ricevût iar sere dal Assessôr a le culture, Ester Filippuzzi, e Andrea Del Favero, diretôr artistic di Folkest, insiemi a Alberto Grassetti de Friulovest Banca e le cjantante e diretore artistiche dal Premi Parodi Elena Ledda, un cuadri dal pitôr spilimberghês Cesare Serafino, oltri a adiudicâsi le partecipazion al prossim Folkest, le edizion dal 2021, e il premi Nuovo Imaie dal valôr complessîf di 15.000 euros pe realizazion di une tournée.
Il grup Musica Spiccia
Pui che un grup, Musica Spiccia e je une vere orchestre, che si caraterize come realtât transgjenerazionâl: une trentine di musiciscj di dutis les etâts dai dîs agns ai “ante”, fruts e adoloessents, adults che e sunin a memorie un grant repertori di oltri cent tocs di musichis dal mont e si esibissin in concierts e spetacui.
E àn ancje incidût 5 cd dai cuai un a Capo Verde cul grup locâl dai fradis Baptistinhas e e àn partecipât a diferentis manifestazions, festival e concors un pôc par dute le Italie e a Capo Verde. Tierç classificât il grup Mesnudì dal Lazi mentri il secont premi al vâ ai Violoncelli Itineranti cun Ana Pilat, union musicâl taliane/croate/slovene.
Durant Folkest a l’è stât inoltri conferît il premi leterari Parole e Musica 2020 a les ex componentis dal grup Le Scimmie di Modena, che e saressin Nara Gavioli Costanzini al bas, e Arianna Ferrari, bateriste dal grup, cul lôr “Note ribelli, in viaggio con le Scimmie dall’Emilia al beat rock progressivo” (Artestampa 2019. El rock al feminîl des Scimmie di Modena tes pagjinis di Nara Gavioli, dulà che e conte le storie particolâr dal grup dut al feminîl, nassût a le fin dai agns ’60. E son stadis forsit il prin comples rock dome di feminis in Italie ma in pôcs si visin des Le Scimmie, un grup che a l’à cjalcjât i palcs di locâi e placis di dut il Biel Paîs in nûf agns di ativitât dal 1966 al 1974, vivint aventurôs viaçs in tren, in autostop e in furgon tra cassis, ghitaris, amplificadôrs e ridadis.
