E jentre tal vîf la cuarantesime edizion di Folkest che fint ai 9 di Lui e tire dongje ’sui palcs de regjon artiscj e musicalitâts di dut il mont. L’international folk festival furlan al festeze il travuart dai siei prins cuarante agns cuntune caravane multico che si môf di comun in comun, di borc in borc, passant par puescj de memorie e valorizant gjenars che a van dal folk, ae world music, dal jazz ae cjançon d’autôr intun corisi daûr di propuestis e grups che a vegnin de Italie, Scozie, Ingletiere, Bielorussie, Irlande, Australie, Olande e Svezie.

La “caravane Folkest” e je spietade doman (miercus ai 27 di Jugn, aes 21.15) a Pesincjane di Flum cu la esibizion di doi grups: il cuartet furlan dai AlterMIX Quartet e il doi componût dal inglês Russell Joslin e la australiane Sarah McCaig. Metûts sù tal 2015 tra Udin e la Cjargne il grup di Noela Ontani (flaut traviers), Andrea Zampieri (clarinet), Federico Pace (percussions) e Giovanni Grisan (ghitare) al à fat de ecleticitât la sô marche di fabriche, cun gjenars che a van dal pop al rock, dal baroc ae musiche tradizionâl. A insiorâ la serade lis bielis armoniis vocâls dal cjantautôr e ghitarist folk dal nord est de Ingletiere Russell Joslin, cressût tal Wiltshire ma trasferît ’subit dopo a Londre, e la cjantante australiane Sarah McCaig: il doi ’tal è considerât un dai grups plui interessants de aree londinese.

Trê i apontaments che si spietin par joibe ai 28: a Pinçan dal Tiliment, simpri aes 21.15, inmò il doi Russell Joslin & Sarah McCaig, cheste volte insiemi al grup talian Capitano tutte a noi, formazion musicâl nas’sude tal 2013 a Pordenon dentri di un progjet de Cooperative sociâl Itaca, e cumò formade di nûf components. La vocazion principâl dal grup e je chê di dâ acet, la musiche e devente no dome veicul di espression artistiche, ma ancje imprest di cressite personâl.

Simpri joibe a Cjassà, al Parc Europa (aes 21.15) dôs presincis artistichis de Scozie: i Ashcroft, formât di doi vêrs talents (Euan e Lewis McLaughlin), vuê une des formazions plui interessantis de gnove sene musicâl scozese, e il doi Stewart Hardy & Frank McLaughlin, doi soliscj aromai afermâts a nivel internazionâl che a proponin une musiche che e à fonde tes espressions tradizionâls dal Northumbrie e de Scozie: a Folkest a presentin il gnûf album “The Gift”.

Ancjemò joibe serade dute taliane a Vile Correr a Purcie cul ghitarist, compositôr, e rangjadôr sicilian Franco Presti, che al tache il so percors cu la ghitare acustiche par po meti dongje chê eletriche e la semiacustiche, svicinantsi a gjenars diviers, dal folk, al rock fint ae musiche jazz, e il grup etnic popolâr casertan Taranterrae, di cirche dodis elements che al propon un repertori leât ae tradizion dai cjants popolârs contadins cun vôs cun sonoritâts arcaichis, sioris di glissâts e di ambiguitâts modâls. Tra i stilemis che al presente il grup a son la Villanella, il bal ‘ncoppe’ ‘o tammurro, la Tarantella, la Fronna, la Moresca, la Ballarella.
 
Trê i comuns tocjâts di Folkest ancje te zornade di vinars ai 29 di Jugn, cun concierts ducj programâts aes 21.15. A Aquilee spazi inmò ae Scozie cui Ashcroft, e il doi Stewart Hardy & Frank McLaughlin, impen a Poç (S. Zorç de Richinvelde) in Place S. Urbano a ’sunaran doi grups talians, i Fran & The Groovies – o ben Francesca Garavelli, in art Fran, e i siei Groovies (Francesca Soliveri e Stefano Conti) – che a proponin un stîl Folk Pop acustic par inglês, e i Allegra gente, grup che al à lis sôs lidrîs te plui vere tradizion taliane, cuntune atenzion particolâr al cjantautorât contaminât cun ’suns e ritmis dal Sud Americhe, cuasi a cirî continuitât tra tarantelle e samba. A Sauris, in fin, simpri vinars e je inmò la volte dal stîl inconfondibil de vocalitât dal doi Russell Joslin & Sarah McCaig.

Tra sabide ai 30 e domenie al 1n di Lui, i apontaments di Folkest a tocjaran Flumisel, Flaiban, Romans dal Lusinç e Cueste di Cjistielgnûf dal Friûl cun artiscj che a vegnin di Italie, Scozie, Olande e Ingletiere.