O sin al principi de Sierade e, tant che ogni an di cuindis agns incà, a Folkest al è timp di selezions.
Il concors Sunâ@Folkest2018 – Premi Alberto Cesa chest an al cres ancjemò, consolidant la proprie formule, in gracie ancje de disponibilitât di impuartantis medie nazionâls, che a poiaran lis votazions inte seconde fase.
L’obietîf dal concors nol è la semplice competizion fra artiscj ma pluitost podê valutâ pal miôr ce che i artiscj candidâts a sedin in stât di ben figurâ intal program di Folkest. “Sunâ a Folkest-Premio Alberto Cesa” al vûl jessi duncje une vetrine dulà podê assisti a spetacui musicâi dal vîf par valutâ miôr il percors artistic e l’operât dai grups concorints, ufrint tal stes timp ocasions di promozion par ducj i partecipants.
Dopo de prime selezion dai materiâi rivâts ae segretarie dal premi, curade di folkbulletin.com, trê grups par ogni serade a saran clamâts a esibîsi dal vîf devant di une jurie di musiciscj, tecnics e gjornaliscj. Al tiermin de votazion al sarà assegnât un prin e un secont puest in classifiche tra i vincidôrs di ogni serade. Ducj i doi a acuisiran il dirit a esibîsi dilunc dal festival Folkest 2018, intune colocazion che e sarà decidude in maniere insindicabile de direzion artistiche dal festival stes. Lis selezions dal vîf di cheste seconde fase si tignaran a Arezzo, Coreno Ausonio, Loano, Caraglio, Palermo, Caserta, Spilimberc e Verone.
Il grup o l’artist classificât prin di ogni serade al parteciparà a une votazion fate traviers di une pagjine Facebook dedicade, canâi radiofonics, i sîts folkbulletin.com e folkest.com.
I prins trê classificâts di cheste votazion a acuisiran il dirit a partecipâ a une serade finâl (che si tignarà intal mês di Lui, dilunc des seradis finâls dal festival a Spilimberc) par decretâ il vincidôr assolût dal concors Sunâ@Folkest 2018.
Lis juriis des diviersis seradis a segnalaran ancje i artiscj che, a lôr judizi insindicabil, a saran in corse pe assegnazion dal Premi Cesa 2018, par une gnove composizion di stîl tradizionâl.
A ducj i grups partecipants al ven domandât di atignîsi a repertoris musicâi di ducj i gjenars che par convenzion a puedin jessi dal ambit folk, folk-rock, etnic, etno-jazz, new acoustic, minimalist, ghitaristic, cjançon di autôr, contestoriis, artist di strade (cun ativitât musicâl prevalente). Nol costituirà element di merit particolâr l’ûs di un o plui struments etnics intun insiemi di altri gjenar musicâl e nancje di prejudizi particolâr l’ûs di aparecjaduris eletronichis dentri di sonoritâts acustichis: al sarà ritignût discriminant in maniere favorevule, pe amission ae fase sucessive des eliminatoriis, jessi esecutôrs di un insiemi sonôr, che si caraterizi cun imediatece pal propri leam cuntun o plui lidrîs culturâls di cualsisedi part dal mont.
Il concors al è viert a artiscj talians e grups musicâi che tal lôr interni al sedi presint almancul un component di citadinance taliane. A puedin partecipâ grups o artiscj che a vedin o no vedin al atîf albums, ancje cun distribuzion taliane comerciâl, e che a sedin o no sedin titulârs di contrat discografic.
Dut il bant di concors al pues jessi scjariât a chest leam:
https://www.folkest.com//suonarefolkest/
