La storie di Abdullah Ibrahim no je fate dome di colaborazions cui nons plui grancj de storie dal jazz, ma e je colegade in maniere direte ancje ai disvilups sociâi, culturâi e storics dal vincjesim secul. Nassût a Cape Town intal 1934 tant che Adolphe Johannes Brand, al à scomençade la sô cariere intal 1949, ancjemò adolessent, cul non di Dollar Brand. Il pianist al è restât fin ai prins Agns Sessante intal so Paîs di nassite, dulà che al à acompagnât Miriam Makeba e al à fondade la prime impuartante jazz band dal continent african, The Jazz Epistles. Intal 1965, Brand al è stât “scuviert” nuie di mancul che di Duke Ellington, che lu à puartât a New York.
Al à mantignût simpri fuarts i leams cu la Afriche convertintsi al Islam e al à cjapât il non di Abdullah Ibrahim. Dilunc dai Agns Setante e Otante, al è deventât la figure plui rapresentative pe integrazion de sene jazz africane. Ibrahim al fonde il Grup Ekaya (che in lenghe xhosa o zulu al vûl dî “patrie”) a New York, intal 1983: un grup di strumentiscj ecezionâi che al riclame lis liniis melodichis dal cjant popolâr sudafrican, metintlu intal contest de improvisazion jazzistiche. Il repertori, apassionant, al ven basât essenzialmentri su lis composizions plui celebris di Abdullah Ibrahim. Par Ibrahim, la musiche e à une funzion spirituâl e terapeutiche, cuasi siamaniche. Il musicist, in cheste sô vision, al è chel che al met in contat il so spirt cun chel di chei altris, chel che al esprim la gjonde e il dolôr, personâi e coletîfs, la materialitât e la spiritualitât, la memorie dal individui e la storie de int. Tra i jazziscj plui singolârs dai ultins decenis, Abdullah Ibrahim al à metût dongje intai luncs agns dal esili, american e european, une grande cuantitât di colaborazions e di esperiencis, jentrant intal cont dai grancj conciertiscj mondiâi. Cun desenis di discs realizâts, l’artist sudafrican vuê al à tornât a cjapâ puest inte sene culturâl dal so paîs di origjin dulà che come Hugh Masekela e Miriam Makeba al à ancje un rûl di personaç simbul.
Formazion: Abdullah Ibrahim – piano; Noah Jackson – cuintribàs, violoncel; Will Terrill – batarie; Cleave Guyton Jr. – sax alt, flaut, clarinet, otâf; Lancis Bryant – sax tenôr; Andrae Murchison – trombon, trombe; Marshall McDonald – sax bariton.
