Claudio Trotta, milanês, classe 1957, al è un dai produtôrs e promoter indipendents di spetacui dal vîf plui stimâts e impuartants dal mont. Daspò cualchi an di esperience tes radio libaris dai agns Setante, tal 1979 al à fondât Barley Arts, che al è inmò titolâr e anime. Di chê volte al à organizât plui di cuindis mîl events in Italie e tal mont e lavorât cun tancj artiscj, tra chei Bruce Springsteen, AC/DC, Kiss, Sting, David Bowie, Metallica, Frank Zappa, Elio e le Storie Tese, Renato Zero, Ligabue, Negramaro. Propit une rockstar, almancul cemût che a contin chei che a àn lavorât cun o par lui. Ancje se – al dîs cun scletece Trotta – no soi bon “nancje di sunâ il campanel”, e o vîf dispès “cu la sensazion di jessi un ticut sunât”. Une rockstar sui generis che, dopo cuarante agns di cariere, al à decidût di contâ la sô storie tal libri No pasta no show (riferiment clâr ae richieste fate di plui di un artist), une autobiografie che e je tal stes timp la conte di un toc di storie de sene musicâl taliane e internazionâl, contade di un pont di viste particolâr: daûr di un palc. E nol è un câs se al à sielt di clamâ il tour di presentazion tes librariis talianis Whole Trotta tour, ricuardant un toc famôs dai Led Zeppelin.
