Luca Doro Gjat Dorotea al nas a Tumieç intal 1983 e fin di fantat si apassione ae musiche, in particolâr al hip hop. Dopo cualchi disc insiemi cui Carnicats, al ven fûr Vai Fradi, il so prin album solist, là che l’ûs de lenghe furlane, messedade cul talian e cul inglês, al devente il pont di fuarce dal disc che al atire la atenzion dai media talians, incuriosîts dal ûs dal furlan. Intai tescj si fronte plui voltis il teme de emigrazion e dal distac de patrie cun voli incjantât e une vore romantic, ancje se cuntun fîl di amarece. I tapêts musicâi, curâts dal zovin produtôr cjargnel Davare, si avalin dal contribût fondamentâl de Carnicats Live Band, formazion di musiciscj furlans che e acompagne il rapper intes sôs esibizions dal vîf.
