La Fairport Convention e sune il so prin conciert devant di une glesie intal Mai dal 1967 e si cjate pes provis intune cjase clamade Fairport, residence de famee dal ghitarist ritmic Simon Nicol. De Convention in chest edifici al nas il non di un grup che si svicine a celebrâ i cincuante agns di etât. Un numar di no crodi di cambis di formazion al caraterizarà la Fairport intai prins cuindis agns di vite. Di Judy Dyble a Iain Matthews, Sandy Denny, Dave Swarbrick, Dave Mattacks, e tancj altris… Si son disfats intal 1979, par dopo riformâsi a furôr di popul intal 1985 cun Pegg, Mattacks, Nicol e Ric Sanders tal puest di Swarbrick. Al ven clamât ancje il polistrumentist Maartin Allcock e il cuintet al regjistrarà l’unic disc dai Fairport dome strumentâl: Expletive Delighted. Chest insiemi di veterans e di gnovis jentradis al costituirà une des formazions che e à durât di plui, vâl a dî undis agns. Ai prins dai agns Novante si costituìs ancje un cuartet acustic, e lis dôs versions dai Fairport a fasin stradis paralelis. Allcock al lasse a metât dai Novante, e al ven rimplaçât di Chris Leslie al mandulin e violin. Chris al dimostrarà di jessi un compositôr dotât, dant un contribût sostanziôs al insiorament dal repertori. Intal 1998, Dave Mattacks al va intai Stâts Unîts e Gerry Conway al cjape il so puest ae batarie e percussions. Il gnûf secul al cjate i Fairport in otime forme. Lis salis a son plenis e i discs a vendin ben. Un an daûr chel altri si rive al 2017, cuntun gnûf disc e un cincuantenari di celebrâ. Folkest ju onore cul Premi Folkest ae Cariere.
Formazion; Simon Nicol – vôs, ghitare ritmiche; Dave Pegg – bas eletric, mandulin e corâls; Ric Sanders – violin; Chris Leslie – vôs, violin, mandulin, bouzouki; Gerry Conway – batarie e percussions.
