la 41e edizion e je in program dai 20 di jugn ai 22 di lui cuntune anteprime spietade intal cartelon estîf in program par sabide ai 16 di març al teatri miotto di spilimberc cul conciert di debut dal gnûf tour de storiche band “le Orme”

tra i ospits di cheste edizion, insiemi a nons internazionâi e zovins artiscj finaliscj dal “premi folkest-alberto cesa”, ancje il doi shapiro-vandelli intal “love and peace live tour” (cjistiel di udin, ai 9 di lui) e la intramontabile pfm (cjaudistrie ai 20 di lui) impegnade intal “tvb – the very best tour”.
a sierâ la edizion 2019 ai 22 di lui intal cjistiel di udin une grande star internazionâl, la cjantautore canadese loreena mckennit, plui di sessante i apontaments in dut pe edizion 2019, cun plui di 20 comuns furlans, tra chei udin, spilimberc, duìn, fintremai a rivâ in slovenie.

A vegnin di ogni bande dal mont i artiscj che, come ogni Istât fin dal 1979, a animaran i tancj palcs di Folkest, simpri firmât de direzion artistiche di Andrea Del Favero, chest an in program dai 20 di Jugn ai 22 di Lui, cuntune schirie di concierts, incuintris, presentazions editoriâls che a tocjaran cirche uns vincj comuns, tra chei Udin, Spilimberc, Udin ma ancje Cjaudistrie in Slovenie.

A saran come simpri artiscj une vore diferents tra di i protagoniscj dal festival principâl che al esplore lis musichis e lis culturis dal mont: un festival plen di cos pensât propit par dâ vôs aes lidrîs culturâls di ogni bande dal mont, realizât cul contribût de Regjon Friûl-VJ e la poie fondamentâl de Fondazione Friuli, cun dongje la colaborazion dai Comuns coinvolzûts.

A vierzi la stagjon 2019 di Folkest une anteprime cetant spietade in program za par sabide ai 16 di Març aes 9 di sere cuant che ’sul palc dal Teatri Miotto di Spilimberc e montarà sù la mitiche band di rock progressîf dai agns Sessante “Le Orme” intun apontament organizât cul Comun di Spilimberc e Folkgiornale. E je propit une perle che e puartarà inte citât furlane la anteprime assolude in esclusive pal Nordest dal gnûf tour de band cu la presentazion dal gnûf album “Sulle ali di un sogno”.
Il gnûf disc, cun 11 tocs e targât Sony Music – Legacy Recordings ’tal è vignût fûr ai 15 di Març, duncje une zornade prime dal conciert di debut a Spilimberc. “Sulle ali di un sogno” ’tal è un viaç musicâl inmagant midiant lis plui bielis cjançons de storiche band, tornadis a cjatâ e insioradis di colaborazions impuartantis, tra chês chê cun Francesca Michielin (vôs in “Gioco di bimba”), l’ex King Crimson David Cross (che al ’sune il violin in sîs tocs) e il tenôr finlandês Eero Lasorla. Dentri dal album a son ancje doi tocs inedits: “La danza di primavera” e “Un altro cielo”.
Regjistrât ’su lis culinis di Bassano del Grappa chest gnûf disc al nas de idee di celebrâ musicalmentri Michi Dei Rossi, baterist storic de Le Orme, che chest an al fâs 70 agns e che al à selezionât lis cjançons plui rapresentativis di une band che in plui di 50 agns di cariere artistiche e à fate la storie dal rock progressîf talian. Chê di sabide ai 16 di Març a Spilimberc e je une ocasion pardabon uniche pai fans par tornâ a scoltâ il sound carateristic de Le Orme e di gjoldilu pe prime volte pai plui zovins che no ju àn mai scoltâts dal vîf.

Une part impuartante de programazion estive dal festival e je rapresentade de esibizion a Spilimberc intal mês di Lui (5, 6 e 7) dai grups miôr che a partecipin ogni an al Premi Folkest-Alberto Cesa: un contest che al selezione gnûfs talents che a rivin a esprimi cu la propueste musicâl il leam cuntune o plui lidrîs culturâls di ogni bande dal mont o cu la cjançon di autôr. I grups, valutâts di une zurie selezionade di nivel internazionâl, si zuiaran al festival ancje un Premi dât dal Nuovo Imaie pe realizazion di une tournée. Il Premi Folkest, che al propon il progjet culturâl dal festival furlan in diviersis regjons de Italie, puartant fûr regjon il model Folkest, si è davuelt chest an a Arezzo, Loano (SV), Udin, San Pietro in Cariano (VR) Cervasca (CN), Coreno Ausonio (FR) e Succivo (CE). Novitât di cheste edizion dal Premi e je che i prins trê grups selezionâts a Spilimberc a ’sunaran inte seconde serade dai 7 di Lui ancje un toc in lenghe furlane. Finalissime in program ai 8 di Lui cu la conduzion de storiche vôs di Radio Rai Gianmaurizio Foderaro: come simpri la serade e sarà filmade di une troupe de sede Rai dal Friûl-VJ che po le mostrarà par television.
I grups selezionâts e finâl a son i romans Archive Valley, il grup folk-swing dai Monsieur de Rien, il cjantautôr Alessandro Lepore, il grup formât di musiciscj di diviersis bandis dal mont Ensemble du Sud, la band dome di feminis Madamè, il tercet che al esplore il repertori patenopeu dal ‘500/’600 fint in dì di vuê Suonno d’ajere e il cuartet cu la passion pes musichis tradizionâls Brigan.

Dongje dai zovins di talent e cetancj artiscj internazionâi, ancje chest an o podarìn saludâ a Folkest cualchidun dai artiscj plui famôs dal panorame di cjase nestre, o che dut câs a àn fat de Italie il palc preferît scomençant cul doi Shapiro-Vandelli: i doi artiscj si son “tornâts a cjatâ”, dopo une vite di rivalitâts, distancis, diferencis di caratar, formazion e stîi di vite, ma ancje di rispiet e grant amôr pe musiche. Shel Shapiro e Maurizio Vandelli a ’sunaran intal cjistiel di Udin martars ai 9 di Lui intal “Peace and Love live tour” cjantant ognidun i tocs di chel altri e esibintsi insiemi ’su cualchi toc intramontabil.

Simpri intal mês di Lui, chest volte in place Carpaccio a Cjaudistrie sabide ai 20, e sarà la volte di un altri non storic de nestre musiche: la PFM – Premiata Forneria Marconi e sarà ’sul palc di Folkest 2019 par une tape dal “TVB – The Very Best TOUR” organizade cu la Comunitât taliane e l’Aias Cjaudistrie, che e cjape dentri i ’sucès plui grancj dal grandissim repertori. Il gnûf tour al partìs daspò de tournée internazionâl intense che e à tocjât il Gjapon e lis Americhis passant pal Ream Unît e dopo la “Cruise to the edge”, il plui grant festival Prog Rock dal mont dulà che e je stade invidade pe tierce volte, uniche presince taliane ’sul palc che al à ospitât ancje i YES.

A sierâ cheste edizion e sarà une presince straordenarie: cuntun gnûf album di inedits publicât chest an, cul titul “Lost Souls” (Quinlan Road, 2018), e torne in Italie la cjantautore e polistrumentiste canadese di fame mondiâl, simbul de musiche celtiche, Loreena McKennit, cuntun tour estîf di sîs datis vie pe Italie. Di là di Firenze, Milan, Rome, Macerata e Bari, lunis ai 22 di Lui e sarà par Folkest tal cjistiel di Udin (biliets za disponibii a partî dal circuit Ticketone, cussì come ’sul sît di Folkest (www.folkest.com) e al Angolo della Musica di vie Aquileia a Udin).