39e edizion – dai 22 di Jugn ai 27 di Lui

Passe sessante i apontaments complessîfs pe edizion 2017, in partence joibe ai 22 di jugn a Vile di Flum (parc de cjase dal student, aes 21.15) cul conciert dai Heron Valley, band folk scozese di Argyll, che dopo un tour in dut il ream unît e rive pe prime volte in Italie. Il grup al repliche a S. Zuan dal Landri (vinars ai 23 aes 20.30) e a Cjaselis (Mortean) sabide ai 24 aes 21.15. Grande spiete, miercus ai 28 a Montreâl, par un dai concierts “top” de edizion cun Enzo Avitabile cul so acoustic world, un tour che al torne a proponi in clâf acustiche in tercet la sô grande produzion discografiche. Tra i artiscj dal istât dal 2017 di Folkest, che al va indevant fin ai 27 di lui che al ven, ancje Teresa De Sio, Ray Wilson, Ron, I Fairport Convention, il cjantautôr Maldestro e tancj altris.
grande conclusion ai 27 di lui cun Abdullah Ibrahim al parc di Vile Manin

A vegnin di ogni bande dal mont i artiscj che, come ogni Istât e cence interuzion dal 1979, a animaran i tancj palcs di Folkest, il festival principâl e che al va indevant di plui agns, che al esplore lis musichis e lis culturis dal mont, cuntune schirie di concierts programâts intun totâl di 24 placis dal Friûl – Vignesie Julie (tra chescj Udin, Spilimberc, Vile Manin, Tumieç) ’fin a tocjâ Cjaudistrie e la Slovenie.

In partence cheste 39e edizion cun artiscj tant diferents tra di e un festival di cos pensât par valorizâ dute la musiche che e sa dâ vôs aes lidrîs culturâls di cualsisedi bande dal mont. Si partìs joibe ai 22 di Jugn a Vile di Flum (aes 21.15, parc de Cjase dal student) cu la band folk/tradizionâl scozese Heron Valley, componude di sîs elements – violin, armoniche, cuarnamuse scozese, tin whistle, ghitare, piano, vôs, bas, banjo e batarie – che e à vût un svelt e fuart impat ’su la sene musicâl tradizionâl dal paîs di origjin. Dopo di un tour che al à tocjât dut il Ream Unît, a rivin cumò pe prime volte in Italie. Si repliche te Grote di S. Zuan dal Landri vinars ai 23 e a Cjasielis (Mortean) sabide ai 24 di Jugn.

Dopo il focus dal an passât, incentrât ’su la Sardegne, Folkest i fâs onôr ae musiche popolâr taliane movintsi chest an ’su la citât di Napoli. A vuidâ la liste dai artiscj partenopeus presints chest an il grant Enzo Avitabile, un artist che al cjante il Sud e lis perifariis dal mont: no dome lûcs gjeografics, ma un stât dal anim e de cundizion umane. Vincidôr resint di ben doi Premis David di Donatello pe miôr colone sonore e pal miôr toc dal film rivelazion dal an, “Indivisibili” di De Angelis, Avitabile si esibirà a Montreâl ai 28 di Jugn (za viertis on line lis prevenditis ’sul sît folkest.com), intune formazion inedite in tercet che e torne a proponi in clâf acustiche i siei plui grancj ’sucès. Intal tour “Acoustic world”, o tornarìn a scoltâ tocs storics intune version intime e emozionâl che e esalte il so lengaç musicâl une vore personâl, une cifre origjinâl che lu à fat deventâ un dai riferiments mondiâi de “World Music”. Avitabile al à colaborât cun cualchi zigant de musiche mondiâl (di James Brown a Tina Turner e Marcus Miller, dome par fâ cualchi non) e cun artiscj de sô tiere, tant che Pino Daniele e Edoardo Bennato.

Il focus partenopeu al viôt ancje la presince di Teresa De Sio cuntun grant omaç a Pino Daniele, in program a Cjaudistrie ai 21 di Lui. Domenie ai 2 di Lui invezit, a Tumieç, in doi dîs di concierts organizâts tes zornadis dal prin e dai 2 di Lui cun Nuova Pro Loco Tolmezzo, e montarà ’sul palc une vôs partenopee zovine, il cjantautôr Maldestro, pardabon un enfant prodige, artist talentuôs tant intal teatri (come atôr, regjist e dramaturc al à vinçût tancj premis di une vore zovin) che inte musiche: al rive secont ae Targhe Tenco tant che miôr album di esordi e secont inte sezion gnovis propuestis dal ultin Festival di Sanremo, vincint il premi de critiche “Mia Martini”. A Tumieç ancje Nobraino e Doro Gjat.

Nol mancjarà te 39e edizion di Folkest il mont de cjançon anglosassone cui princips e inventôrs dal folk-rock britanic, i Fairport Convention, ai 10 di Lui a Spilimberc, e la vôs e front man dai Genesis, un dai grups plui impuartants e inovatîfs de storie dal rock progressîf, Ray Wilson, in conciert simpri a Spilimberc, ai 11 di Lui. Spazi ancje pes gnovis frontieris dal folk-metal, cui lombarts Folkstone ai 12 di Lui a Spilimberc e, pe grande cjançon di autôr taliane, la esibizion di Ron ai 22 di Lui a Cjaudistrie.

A sierâ il grant Istât di Folkest 2017 un colòs de musiche mondiâl, il ’sudafrican Abdullah Ibrahim, plui di otante agns, che al svante une storie no dome di colaborazions cui nons plui grancj de storie dai jazz, ma che e je colegade in maniere direte ancje ai disvilups sociâi, culturâi e storics dal vincjesim secul. Nassût a Cape Town intal 1934 tant che Adolphe Johannes Brand, al à scomençade la sô cariere intal 1949, ancjemò fantat, cul non di Dollar Brand. Il pianist ’tal è restât ’fin ai principis dai Agns Sessante intal so Paîs di nassite, dulà che al à acompagnât Miriam Makeba. Intal 1965 ’tal è stât “scuvierzût” nuie di mancul che di Duke Ellington, che lu à puartât a New York. Dilunc dai Agns Setante e Otante, ’tal è deventât la figure plui rapresentative pe integrazion de sene jazz africane. Il conciert si tignarà ai 27 di Lui intal Curtîl di onôr di Vile Manin inte ’suaze dai apontaments di Villa Manin Estate nel Parco, in colaborazion cun ERPac (Ent regjonâl pal Patrimoni Culturâl de Regjon Autonome FVJ).

INFORMAZIONS STAMPE: ufficiostampa@volpesain.com
(335.6023988 – 392.2067895)