Cun grande spiete e je in program par miercus ai 15 di Novembar li dal Auditorium Teatri Candoni di Tumieç, la uniche date furlane dal gnûf tour talian, organizât di Barley Arts, di un tra i esponents principâi de corinte progressive rock made in UK, Peter Hammill, vôs storiche dai Van der Graaf Generator.
Artist cul “A” maiuscul e une des vôs plui bielis, emozionants e versatilis di simpri, Peter Hammill al nas a Londre intal 1948 e al oten la atenzion de sene rock internazionâl intai agns Setante tant che leader dai Van der Graaf Generator, che di chei al è cjantant, ghitarist e pianist, e autôr principâl. I components dal grup si molin e a tornin a metisi adun dilunc di dute la cariere, e Hammill al tache in paralêl la ativitât di solist, scomençade intal 1971 e lade indevant regolarmentri par ducj i agns dopo fin a vuê.
Intune classifiche ideâl dai grups rock britanics plui influents intai agns Setante, cuntune vore di probabilitât no cjataressin intes primis posizions i Van der Graaf Generator. Epûr la band vuidade di Hammill, fondade intal 1967 e ative ancjemò vuê dopo lis ripetudis rinassitis e cambis di formazion, e merete un puest di rivuart intal panorame dal rock pe origjinalitât sedi des sieltis musicâls sedi dai temis tratâts. Di fat, dal pont di viste musicâl pûr jessint assimilâts al filon progressive, la band e je ben lontane dai barochisims e dai virtuosisims dai grups lôr contemporanis (Emerson Lake & Palmer e Yes, just par ricuardâ doi tra chei plui famôs). La musiche e je tal stes timp complesse e essenziâl, lis atmosferis a son scuris e suturnis (si podarès definîlis “gotichis”) e a rifletin i tescj scrits di Hammill: la ispirazion no derive de mitologjie e de epiche (tant che pai Genesis), ma dal drame interiôr e dal malstâ esistenziâl.
Al ricurde Claudio Trotta, che al à organizât il prin conciert dal artist britanic intal 1987 a Gjenue: «Peter Hammill al è un zigant de storie de Popular Music e al à segnât moments impuartants de Barley: o ricuardi cun emozion particolâr il conciert al Conservatori, part de rassegne di Musiche Contemporanie Musica nel Nostro Tempo, cuant che al à provât un toc “a cappella”, cence aiût di struments e nancje microfon, ipnotizant dute la platee di 1500 personis presintis».
L’ultin lavôr di solist di Hammill al è …All That Might Have Been…, vignût fûr intal 2014; dopo Do Not Disturb (2016), il trentesim album dai Van De Graaf Generator, il compositôr al è cumò daûr a lavorâ suntun gnûf cjapitul de sô cariere soliste.
Chê di Tumieç, uniche date par dut il Nord Est (chês altris placis a son Rome, Napoli, Terni, Chiari, Milan e Livorno) si profile tant che un gnûf grant apontament proponût di Folkest ai apassionâts di musiche de nestre regjon. Lis prevenditis a son viertis uficialmentri, par informazions: www.folkest.com
Informazions e prevenditis su www.folkest.com
Angolo della Musica- Vie Aquileia 89, UDIN tel. + 39 0432 505745
Agjenzie Soprattutto Viaggi (ex corte del libro) Vie Ermacora 5, TUMIEÇ (Ud) tel. + 39 0433 46826
Punto Verde – Vie Matteotti 4/b TUMIEÇ (Ud) tel. + 39 0433 40114
Biliet: € 23,00
INFO STAMPA: ufficiostampa@volpesain.com
(335.6023988 – 392.2067895)
— volpe&sain comunicazione – Immedia S.V. ufficiostampa@volpesain.com mobile phone (0039) 3922067895 – 3356023988
