Come ogni an e je partide a Arezzo la lungje caravane dal Premi Folkest-Alberto Cesa, il concors che al cîr gnûfs talents che a sunaran inte prossime edizion di Folkest, zuiantsi ancje la pussibilitât di vê un Premi dal Nuovo Imaie di ben cuindis mîl euros pe realizazion di une tournèe. Il Circolo Aurora in place Sant’Agostino di Arezzo, benemerite associazion di bravis personis che si dedichin ae culture e al sociâl, e à dât acet intal 2004 ae prime serade di chel che intes primis edizions si clamave Suonare@Folkest e cumò Premi Folkest-Alberto Cesa. Un inizi fortunât, che a chel a son vignudis daûr tantis edizions, dutis caraterizadis di une grande cualitât musicâl. Ai 6 di Dicembar, dilunc di un conciert dal vîf dentri tal Festival Pifferi, Muse e Zampogne, direzût come ogni an cun grande competence di Silvio Trotta, trê grups si son sfidâts a colps di notis: intal ordin Archive Valley, Sambene e Calimani. I Archive Valley a son un tercet roman formât intal 2017 che al cjape ispirazion dal Old Time Music, espression origjinâl dai Monts Appalachi, di dulà però che si spostin in cetancj ambits diferents, intun miscliç folk sperimentâl di grande intensitât. Edoardo Petretti, Matan Rochlitz e Marco Zenini si alternin cun banjo, mandolin, cuintribàs, piano e fisarmoniche e si dimostrin musiciscj une vore brâfs, impressionant la jurie ancje pe biele presince su la sene. Po dopo e je stade la volte dai Sambene, che a vignivin de publicazion di un biel disc produsût di Michele Gazich, recensît ancje chi su Folk Bulletin. Nassûts te Academie dai Cjantautôrs di Recanati (MC), direzude di Lucia Brandoni, i Sambene a mutuin il non de peraule sarde che e vûl dî sanc, come passion e energjie, e a son un grup cuntune fuarte conotazion cjantautorâl su buinis lidrîs folk, dulà che a vegnin fûr ben lis trê vôs presintis: chê masculine di Marco Sonaglia, ghitarist e autôr di cetancj tescj e musichis, e chês femininis di Roberta Sforza e Veronica Vivani. A plasin lis lôr cjançons di lote, i ricuarts de vite partigjane intal teritori des Marche, ancje se il teme ae fin al pues risultâ un pôc monocuarde. Grande passion e buine organizazion gjenerâl dal grup, i Calimani, grup di cjase, a nassin te fin dal 2016 dal duo toscan Mattia Tartaglia e Francesco Checcacci, cuntun progjet essenziâl, slargjât a grup: ukulele, batarie e vôs, cu la idee di font di maglâ il folk cul pop, cuntune vualmade incjantade, ironiche, autoironiche e soredut une vore semplice. A àn une biele presince su la sene, ancje se a àn inmò cualchi ingjenuitât di netâ vie dilunc de strade. Si viôt tante passion, a mioraran cul timp. E vâl la pene di ricuardâ cemût che l’obietîf dal Premi Folkest-Alberto Cesa no sedi dome la competizion tra artiscj, ma ancje il fat di podê valutâ miôr, intun contest dal vîf, lis propuestis miôr intal panorame folk world e cjantautorâl. Cul valôr in plui, come che si è za dit, pal vincidôr assolût, dal premi finâl dât dal Nuovo Imaie pe realizazion di une tournèe. Un pôc dificil il lavôr de jurie, par vie des tantis diferencis tra lis propuestis in gare. Ae fin a son stât nomenâts vincidôrs in maniere juste i romans Archive Valley.
