Come ogni an e partìs di Arezzo la caravane dal Premi Folkest-Alberto Cesa, il concors che al cîr gnûfs talents che a ’sunaran inte prossime edizion di Folkest, zuiantsi ancje la pussibilitât di vê un Premi dal Nuovo Imaie di ben cuindis mîl euros pe realizazion di une tournèe.
Storiche la sede di cheste prime tape, il Circolo Aurora in place Sant’Agostino di Arezzo, ’parcè’ che propit chi, intal 2004, si è davuelte la prime serade di chel che intes primis edizions si clamave Suonare@Folkest. Un inizi fortunât, che a chel a son vignudis daûr tantis edizions, dutis caraterizadis di une grande cualitât musicâl.
Ai 6 di Dicembar, dilunc di un conciert dal vîf dentri tal Festival Pifferi, Muse e Zampogne, direzût come ogni an cun grande competence di Silvio Trotta, trê grups si son sfidâts a colps di notis: intal ordin Archive Valley, Calimani e Sambene. I Archive Valley a son un tercet roman formât intal 2017 che al cjape ispirazion dal Old Time Music, espression origjinâl dai Monts Appalachi. Edoardo Petretti, Matan Rochlitz e Marco Zenini si alternin cun banjo, mandolin, cuintribàs, piano e fisarmoniche creant un miscliç folk sperimentâl intens e imprevedibil.
I Calimani a nassin te fin dal 2016 dal duo toscan Mattia Tartaglia e Francesco Checcacci, cuntun progjet essenziâl: ukulele, batarie e vôs, cu la idee di font di maglâ il folk cul pop. Un dissen sonôr che po si è slargjât a altris strumentiscj e palesât intal prin disc a pene vignût fûr: cuntune vualmade incjantade, ironiche, autoironiche e soredut une vore semplice.
Nassûts te Academie dai Cjantautôrs di Recanati (MC), direzude di Lucia Brandoni, i Sambene a mutuin il non de peraule sarde che e vûl dî sanc, come passion e energjie, e a son un grup cuntune fuarte conotazion cjantautorâl ’su buinis lidrîs folk, dulà che a vegnin fûr ben lis trê vôs presintis: chê masculine di Marco Sonaglia, ghitarist e autôr di cetancj tescj e musichis, e chês femininis di Roberta Sforza e Veronica Vivani.
E vâl la pene di ricuardâ cemût che l’obietîf dal concors e dal Premi Folkest-Alberto Cesa no sedi dome la competizion tra artiscj, ma ancje il fat di podê valutâ miôr, intun contest dal vîf, lis propuestis miôr intal panorame folk, world e cjantautorâl. Cul va in plui, come che si è za dit, pal vincidôr assolût, dal premi finâl dât dal Nuovo Imaie pe realizazion di une tournèe.
A son però dongje ancje lis prossimis selezions, che ’tal sarà ai 4 di Zenâr a Loano (SV) al Palaç Kursaal, li de Biblioteche Civiche, cun Massimo Lajolo e Onde Medie, Monsieur De Rien e Stona; ai 18 di Zenâr a Udin, a la Girada cun Alessandro Lepore, Bratiska e The Breeze; ai 31 di Zenâr a S.Pietro in Cariano (VR) a La fontana ai ciliegi, cun Ensemble du Sud, Francesco Garolfi e The Funny Farm; al 1 di Fevrâr a Cervasca (CN) li de sale de Proloco, cun Gian Luca Di Santo, Madamè e Sheegoolah; ai 23 di Fevrâr a Coreno Ausonio (FR) all’Auditori Comunâl, con Francis-Q, Suonno d’ajare e Ars Nuova Napoli e ae ’fin ai 24 di Fevrâr a Succivo (CE), cun Luisa Notarangelo Duo, Officine Popolari Lucane e Pastellesse Sound Group.