Al Premi Folkest Alberto Cesa 2019 a van indevant lis selezions nazionâls, ai 31 di Zenâr a Verone il cuart apontament dal lunc tour che al finarà a Spilimberc ai 8 di Lui.
Dopo des primis dôs datis di Arezzo e Loano, dentri dal Festival “Pifferi, Muse e Zampogne” e de rassegne “Racconti d’inverno”, e chê di Udin, la caravane dal Premi Folkest – Alberto Cesa, il concors che al cîr gnûfs talents che a sunaran inte ocasion de prossime edizion di Folkest, zuiantsi la pussibilitât di vê un Premi dal Nuovo Imaie di ben cuindis mîl euros pe realizazion di une tournèe, e rivarà a San Pietro in Cariano. Come pal solit la selezion e sarà ospitade de Fontana ai Ciliegi, il locâl storic de musiche. Un apontament consolidât di tancj agns, aromai une biele tradizion.
Joibe ai 31 di Zenâr, tacant des 21.15, inte aromai storiche sale di San Pietro in Cariano, si sfidaran trê formazions: i prins a montâ sul palc a saran i The funny farm, une strane formazion che e ven de zone di Brescia, fuarte di mil diviersis influencis che a contribuissin a creâ il lôr sound particolâr.
Po dopo Francesco Garolfi ghitarist, compositôr, rangjadôr e produtôr une vore elegant che al va dal blues al rock, dal indie al prog, de world music ae musiche di autôr, de musiche popolâr ae classiche contemporanie, passant pes sonorizazions pal cine e la publicitât e la musiche pal teatri e la leterature.
I ultins a esibîsi l’Ensemble du Sud, formât di musiciscj origjinaris di diviers paîs dal mont come Cine, Romanie, Venezuela, Senegal, Moldavie, Italie, che al propon un miscliç di gipsy folk, balkan, cumbia, samba jazz, funky, afrocaribbean music, coladeira.
E vâl la pene di ricuardâ che l’obietîf dal concors e dal Premi Sunâ a Folkest – Premi Alberto Cesa no je dome la competizion tra artiscj ma soredut la pussibilitât di podê valutâ miôr, intun contest dal vîf, lis propuestis miôr dal panorame folk, world, autorâl e cjantautorâl talian che a puedin jentrâ di dirit tal program di Folkest.
Une serade cun musiche di cualitât, tra lidrîs e cjançons di autôr par chest biel conciert che si davuelzarà
ae Fontana ai Ciliegi a partî des 21.15 joibe ai 31 di Zenâr.
Par informazions: info@folkest.com –