… al partìs di Spilimberc il tour 2019 cu la anteprime di presentazion dal gnûf album “Sulle ali di un sogno”…

SPILIMBERC- Folkest, l’international folk festival furlan che aromai di cuarante agns al esplore lis musichis e lis culturis dal mont, al propon ancje pe sô 41e edizion une buine anticipazion de Vierte cun Folkest in Primavera 2019, che al ven prime de solite colocazion estive dal festival, in calendari tra i mês di Jugn e Lui (20 Jugn – Lui lis datis di chest an). 
Il prin dai apontaments de Vierte ’tal è un vêr e propri event cu la anteprime dal conciert di presentazion dal gnûf album de mitiche band di rock progressîf dai agns Sessante Le Orme, che e propon in esclusive pal trivenit al Teatri Miotto di Spilimberc sabide ai 16 di Març aes 9 sore sere la viertidure dal tour “Sulle ali di un sogno”.

Dopo un 2018 che al à viodût Le Orme protagoniscj di doi tour tal forest (Gjapon a Mai e Messic a Novembar) e di un tour talian cul storic violinist dai King Crimson, David Cross, il gnûf an si vierç cu la presentazion di chest gnûf album, che al sarà in distribuzion cui 15 di Març dal 2019. Par presentâ “Sulle ali di un sogno”, chest gnûf cjapitul discografic, Le Orme a àn fat une sielte in cuintritendince, decidint di esibîsi intai teatris lontans des grandis citâts, fasint di mancul des solitis tournée che a finissin par tocjâ simpri chei cartelons dai principâi teatris talians. Une sielte un pôc cuintri corint par un grup storic cun cincuantetrê agns di cariere, che al à ’sunât in dut il mont e in dutis lis citâts di Italie, che al à vendût milions di discs e che al continue a vê i discs dai agns Setante (Collage, Uomo di Pezza e Felona e Sorona) inmò vuê intai negozis e intai store online.

Il gnûf disc al sarà un salt intal passât cuntune cjalade bande dal avignî. Dal 2019 di fat, la formazion de Le Orme e torne a vê in forme stabile un ghitarist eletric inte sô formazion: une line-up di grant va, cun Michi Dei Rossi ae batarie, Michele Bon al hammond, al piano, aes tastieris e sinth, Alessio Trapella al bas, ae vôs, ae ghitare e ae pedaliere di bas e Ivan Geronazzo ae ghitare eletriche, classiche e acustiche. Chê di Spilimberc e je une ocasion pardabon straordenarie pai fans storics par tornâ a scoltâ il carateristic sound de Le Orme e gjoldilu pe prime volte pai plui zovins che no ju àn mai scoltâts dal vîf.

Cognossût come un dai grups talians plui amâts, impuartants e famôs ancje tal forest Le Orme a son, tra lis tantis bands che a vegnin de epoche beat, chê che e à vût la evoluzion plui convincente intai agns ’70. Formâts a Marghera (dongje Vignesie) intal 1966, a saltarin fûr ’su disc intal 1967 cun “Fiori e colori”, regjistrât de formazion a cuatri origjinâl. Il grup al ve un singul di grant ’sucès cun “Senti l’estate che torna” e al regjistrà il prin album “Ad Gloriam” ae fin dal 1968, fasintlu vignî fûr l’an dopo. Contignût intune cuviertine origjinâl e une vore carateristiche, l’album ’tal è inmò considerât un dai miôr de ere beat taliane, cuntune vene un pôc psichedeliche in cjançons come “Io non so restare solo”, “Fumo”, “Milano 1968”. Intal 1970 il grup al firmà pe Philips, che e à po publicât i 10 albums seguitîfs intai stes agns. La vecje etichete Car Juke Box e publicà chê volte “L’Aurora”, une racuelte di tocs di 45 zîrs che e je une vore rare. Il prin album pe Philips, e ancje il prin come tercet, al fo “Collage”, cun Aldo Tagliapietra passât de ghitare al bas e il grup cuntun gnûf ’sunôr basât ’su lis tastieris intal stîl di cualchi grup forest come Emerson Lake & Palmer. I trê a lerin ancje a Londre par seguî la atuâl evoluzion musicâl. Un bon album, “Collage” al à cualchidun dai miôr tocs di simpri, come “Sguardo verso il cielo” e “Cemento armato”.

Prevenditis viertis pal conciert dai 16 di Març al Teatri Miotto di Spilimberc: Informazions par comprâ i biliets: info@folkest.com – 0427 51230 – 335 1202124

Prevenditis online: www.folkest.com o li di Folkest (Teatri Miotto) – Spilimberc (tel 0427 51230); “Angolo della Musica” in vie Aquileia 89 Udin (tel 0432 505745); “Fioreria Punto Verde” in vie Matteotti, 4/b a Tumieç (tel. 0433 40114).

INFO STAMPA: ufficiostampa@novajra.it
(335.6023988 – 392.2067895)