A van indevant tes placis de regjon i concierts de cuarantesime edizion di Folkest che ’fin ai 9 di Lui al clame dongje ’sui palcs di plui di 25 comuns artiscj e musicalitâts di ogni bande dal mont.
L’international folk festival furlan al festeze il travuart dai siei prins cuarante agns valorizant gjenars che a van dal folk ae world music, dal jazz ae cjançon d’autôr intun corisi daûr di propuestis e di grups che a vegnin de Italie, Ingletiere, Bielorussie, Irlande, Australie, Olande e Svezie.

La “carovane Folkest” e je spietade vinars ai 29 di Jugn aes 21.15 a Aquilee in Place Cjapitul cun dôs presincis artistichis de Scozie: i Ashcroft, cun doi vêrs talents, Euan e Lewis McLaughlin, vuê une des formazions plui interessantis ’su la gnove sene musicâl scozese, e il doi Stewart Hardy & Frank McLaughlin, doi soliscj aromai afermâts a nivel internazionâl che a proponin une musiche che e à lis sôs lidrîs tes espressions tradizionâls dal Northumbrie e de Scozie: a Folkest a presentin il gnûf album “The Gift”.

Inmò vinars aes 21.15 in Place S. Urbano a Poç (S. Zorç de Richinvelde) a ’sunaran doi grups talians, i Fran & The Groovies – o ben Francesca Garavelli, in art Fran, e i siei Groovies (Francesca Soliveri e Stefano Conti) – che a proponin un stîl folk pop acustic par inglês, e i Allegra gente, grup che al à lidrîs te plui vere tradizion taliane, cuntune atenzion particolâr al cjantautorât contaminât cun ’suns e ritmis dal Sud Americhe, come a cirî continuitât tra tarantelle e samba. Inte stesse sere a Sauris e je la volte dal stîl inconfondibil de vocalitât dal doi componût dal inglês Russel Joslin e la australiane Sarah McCaig, considerât un dai grups plui interessants de aree londinese (orari simpri 21.15).
Sabide ai 30 di Jugn in vie Nazionale a Paparian (Flumisel, aes 21.15) inmò il doi scozês dai Ashcroft e si spiete ’sul palc ancje la famose cjantautore, regjiste e performer Serena Finatti che e presentarà il so ultin lavôr “Fragile e fiera” dongje di Andrea Varnier, Pietro Sponton e dal ensemble vocâl Sing&Feel.

Simpri sabide a Flaiban in place Monumento protagoniste inmò la Scozie cul doi Stewart Hardy & Frank McLaughlin, impen de Ingletiere e Olande a rivin i Pyrates, une “nâf” di stranis piratis musicâi, plene di struments e di buine musiche: sea shanties inglês, cjançons di mâr irlandesis, drinking songs, bai tradizionâi e gnovis composizions rindudis in maniere ironiche e divertente di une çurme eletriche.
A son considerâts un dai gnûfs spetacui di folk rock european plui interessants dai ultins agns. La formazion e je componude di David Gallows ae vôs, ghitare e mandulin, Ralf Zegelink, violin e vôs, Martin van der Mijden, bas eletric e vôs, e Bart van der Akker ae batarie e vôs.

Domenie al 1 di Lui Folkest al va a Romans dal Lusinç a Cjase Candussi Pasiani: aes 21.15 inmò spazi al grup anglo olandês dai Pyrates precedûts ’sul palc de artiste Cristiana Verardo. Ghitariste e cjantautore classe 1990, Cristiana Verardo e je plurilaureade in cjant e musiche oltri che autore di tocs pop di ’sucès e vincidore di tancj concors.

Simpri aes 21.15 di domenie a Vile Sulis (Cueste di Cjistielgnûf dal Friûl) a ’sunin doi grups talians, i laziâi Canusia, che a àn sielt un repertori cetant leât al teritori di origjin, e la band piemontese T’ses Folk: ancje in chest câs al ven fûr di plui un repertori popolâr, divertent e une vore balabil di origjin franc provençâl cun incursions te musiche balcaniche, mediorientâl, finlandese e arturiane.