SABIDE AI 7 DI LUI – SPILIMBERC
Quadreria Tono Zancanaro
11.00 Andrea Marco Ricci (Note Legali) – Dirits d’autôr, dirits conetûts e gnovis realtâts
Tor Orientâl
18.00 Adriana Schepis – Patty Smith – Voglio, ora
19.30 Enzo Gentile e Roberto Crema, Jimi Hendrix, the Italian Experience
Place Garibaldi
20.30 Capitano tutte a noi Italie
21.30 Ponk Republiche Ceche
22.50 La Mesquia Piemont
Place Domo
21.15 La Macina Marcjis
22.00 Tomat Band Twenty for twenty Italie
[button color=”#ffffff” background=”#e35097″ size=”medium” src=”https://ita.calameo.com/read/002746404b93e0df87981″] Program Folkest a Spilimberc [/button]
→ QUADRERIA TONO ZANCANARO
11.00 Andrea Marco Ricci (Note Legali)
Dirits d’autôr, dirits conetûts e gnovis realtâts
L’incuintri al fevele di dirits conetûts primaris e secondaris dai artiscj interpretis e esecutôrs tal cjamp musicâl. O fevelarìn dai rapuarts cui produtôrs fonografics, cu lis cjasis discografichis, di autoproduzion, di gjestion coletive dai dirits de bande di artiscj e produtôrs e… di cemût che si pues vuadagnâ cu la musiche regjistrade…
→ Tor Orientâl
18.00 Adriana Schepis – Patty Smith – Voglio, ora
e introdûs Rita Bragagnolo
La vite di Patti Smith e je fate di resurezions continuis, colps di sene, ats di proteste e svoltis imprevedibilis: une fantate che e zire secje e plene di fam par New York tai agns Setante, jù pes stradis dal Greenwich Village e tes stanziis dal Chelsea Hotel; che e cjate confuart te vuide spirituâl di Arthur Rimbaud, Jimi Hendrix e Jim Morrison, e si vuadagne la stime di Robert Mapplethorpe, William Burroughs, Allen Ginsberg e Bob Dylan. E scomence a cjantâ sul palc dal malsestât CBGB insiemi ai Television e ai Ramones, e ae fin e rive par dut il mont come poete, cjantante e scritore.
Adriana Schepis e je nassude a Triest, i plâs scrivi a lapis, bevi bon cafè e cjaminâ, no i plasin i lapis cence ponte, i grans di cafè su lis mans umidis ni lis scarpis cul tac. Al è un pôc di timp che si è svicinade al zen, ma lui al continue a tirâsi in bande. E à cjapade une lauree in Psicologjie, un dotorât in Psicologjie de comunicazion e un master in Comunicazion de sience.
19.30 Enzo Gentile e Roberto Crema – Jimi Hendrix, the Italian Experience
Enzo Gentile e Roberto Crema – Hendrix’68 – The Italian Experience
Il gnûf libri di Enzo Gentile e Roberto Crema al è dedicât a chê prime e uniche volte che Jimi Hendrix e i siei Experience, formâts di Noel Redding e Mitch Mitchell, a vignerin in tour in Italie, tal mês di Mai dal 1968, a Milan, Rome e Bologne. Fotos mai viodudis, testemoneancis di spetatôrs fortunâts, articui e rivistis originâls, biliets e altris memorabilia: contribûts che a fasin vignî fûr il contest musicâl de epoche insiemi a chel politic e sociâl di une stagjon fondamentâl. La prefazion dal volum e je firmade di Carlo Verdone.
Enzo Gentile (Milan, 1955), gjornalist e storic musicâl, docent universitari, al à scrit par plui di cent tra cuotidians e rivistis. Al à publicât uns cuindis libris, curât mostris, fat programs radio-televisîfs, frecuentât concierts e festival par dut il mont. E lu fâs inmò.
Roberto Crema, colezionist hendrixian, al è fondadôr e curadôr dal blog dedicât a Hendrix e president de associazion omonime. Dilunc dai agns al à colaborât a diviers libris dedicâts al artist e tal 2014 al à realizât il documentari “Jimi Hendrix, Bologna 26 maggio 1968”, presentât in anteprime al Biografilm Festival.
→ PLACE GARIBALDI
20.30 Capitano tutte a noi – Italie
Capitano tutte a noi – La musiche e je acet (cooperativa Itaca)
Musiche e dirits cuntune riflession vierte sui temis dal sociâl, di 17 agns in ca Cooperativa sociale Itaca e Folkest a son impegnâts un dongje di chel altri intune otiche di sensibilizazion sul acet des personis e sul rispiet di dutis lis individualitâts. Parcè che tignî cont il dirit di citadinance al vûl dî ancje potenziament de autonomie de persone e valorizazion di dutis lis abilitâts. Par dâ plui fuarce al so impegn, Itaca ancje chest an – e pal cuint an seguitîf – e sarà presinte a Folkest cul progjet “Capitano tutte a noi”, grup musicâl nassût tal 2013 a Pordenon e cumò formât di nûf components. Carateristiche dal progjet “Capitano tutte a noi” e je chê di fâ jentrâ altris components in ogni moment, ancje dome par condividi une esperience musicâl di scolte di chel altri, dulà che il grup, oltri che musicâl, al devente une famee, un grup di amîs. Un puest e un laboratori di confront dulà che i elements principâi a son la fuarce dal grup e la condivision di une passion comune, la musiche, che e devente sûr, amie e e je di cjase.
21.30 Ponk – Republiche Ceche
Lis gnovis esperiencis dal folk a vegnin de Republiche Ceche. A misturin e a messedin folk cun pop e funk, i PONK a son un tercet de Moravie, fondât tal 2013. Inovazion e tradizion cuntun strument principâl, il cimbalom cul so sunôr carateristic e vivarôs. Ma no dome. Liron, violin, ghitare e efiets e cun armoniis vocâls une vore bielis e straordenariis.
Formazion:
Michal Krystýnek – vôs e violin;
Eduard Tomaštík – cimbalom e vôs;
Jakub Nožička – liron e vôs.
22.50 La Mesquia – Piemont
Doi discs publicâts, vincidôrs tal 2015 dal concors Suonare@Folkest, a son tra lis realtâts plui vivis de sene des vals di culture ocitane dal Piemont. Tra il 2016 e il 2017 si son dedicâts ae composizion di gnûfs tocs e ae realizazion di cualchi video par un gnûf progjet discografic, “l’ÀRBOL”, che al vignarà presentât in anteprime a Folkest. Tal stes periodi, in colaborazion cul atôr Luca Occelli a àn preparât il spetacul teatrâl cun titul: “Alberi, Asini, Uomini e Donne”.
Formazion:
Remo Degiovanni – autôr, gjironde, sunete e vôs;
Luca Pellegrino – vôs, armoniche, flauts e pive;
Manuel Ghibaudo – organet;
Alessia Musso – arpe celtiche;
Giorgio Marchisio – liron;
Silvio Ceirano – percussions.
→ PLACE DOMO
21.15 La Macina – Marcjis
Grup di ricercje e cjant popolâr La Macina
Une ativitât che e dure di passe cuarante agns, la publicazion di ben sedis LP e dal volum “Cultura Popolare Marchigiana”, pal sigûr la racuelte di cjants e tradizions popolârs plui ample e organiche des Marcjis, a fasin dal Grup di Ricercje e Cjant Popolâr La Macina il puartevôs di prin plan dal patrimoni popolâr cetant sior des Marcjis. Il grup La Macina al è un coletîf di indagjin etnomusicologjiche che i ten al so rigôr sedi tal sens de ricercje che in chel dal tornâ a proponi. Il sens dal lavôr dal grup al è in chel che a disin cjantant, par cemût che lu cjantin, pe espressivitât estreme, par cemût che a rivin a gjavâ fûr linfe des lidrîs plui profondis de lôr tiere, fasint propriis lis modalitâts e i rîts de civiltât contadine, che a pandin cun rispiet esemplâr e amôr. La Macina, tra l’altri, e je rivade a fâ nassi, tal 1988, il Centri Tradizions Popolârs, operant no dome come struture di conservazion, ma soredut come agjent di promozion e studi de musiche e des tradizions.
Formazion:
Gastone Pietrucci – vôs;
Adriano Taborro – ghitare, mandolin, vôs, direzion musicâl;
Marco Gigli – ghitare, vôs, percussions;
Roberto Picchio – armoniche;
Michele Lelli – percussions;
Riccardo Andrenacci – batarie;
Giorgio Cellinese – coordenament.
22.00 Tomat Band – Twenty for twenty – Vincj agns di Sting in vincj cjançons, Italie
Un progjet nassût di une idee di Davide De Lucia, Andrea Del Favero, Flavio Paludetti e Cristian Cecchetto, dedicât ae figure dal artist inglês Gordon Matthew Sumner, cognossût di plui come Sting. No dome une selezion di une serie di cjançons, pal plui di chês famosis, par un conciert di cover, ma une analisi e un tornâ a lei une part dai tancj tocs scrits di Sting ae lûs di cualchi considerazion musicâl, tecniche, estetiche e leterarie. E continue cussì la colaborazion tra Folkest e Associazion Musicâl Tomat, che e torne a proponi la Tomat Band, che e veve za vût sucès cul conciert di Folkest 2017 e che e à presentât la riedizion dal disc Tapestry di Carole King.
Formazion:
Francesca Viaro – vôs;
Flavio Paludetti – ghitare;
Nevio Zaninotto – sax sopran;
Cristian Cecchetto – batarie;
Davide de Lucia – piano e tastieris;
Eugenio Dreas – liron e bas eletric;
Jacopo Russo – ghitare.
[button color=”#ffffff” background=”#e35097″ size=”medium” src=”https://ita.calameo.com/read/002746404b93e0df87981″] Program Folkest a Spilimberc [/button]
